先睇總覽：餐廳常見嘅 4 類保障
| 保障 | 法例要求？ | 主要保咩 |
|---|---|---|
| 勞工保險（僱員補償保險） | ✅ 法例必買 | 員工因工受傷（燙傷、割傷、滑倒等）嘅法定補償同普通法責任 |
| 公眾責任保險 | 非法例強制，常見做法 | 客人或第三者喺舖內受傷、食物中毒等索償 |
| 財產 + 營業中斷保險 | 非法例強制，值得考慮 | 裝修、廚房設備、存貨損失，同停業期間嘅收入損失 |
| 團體醫療保險 | 非法例強制，屬員工福利 | 員工門診 / 住院醫療，有助請人留人 |
1. 勞保：唯一一樣法例規定必買
根據《僱員補償條例》（香港法例第282章）第40條，所有僱主必須投購僱員補償保險，承擔僱主喺法律（包括普通法）之下嘅責任，否則唔可以僱用僱員做任何工作——不論合約期或工作時數長短、全職或兼職、長工定臨時工。餐廳最常見嘅盲點正正係呢度：午市晚市請嘅兼職侍應、週末幫手嘅散工、洗碗姐姐，全部都要包埋。詳情可以睇返我哋嘅 兼職／散工勞保攻略。
法例亦規定咗最低投保金額（以每宗事故計算）：
- 僱員數目不超過 200 人：不少於港幣 1 億元
- 僱員數目超過 200 人：不少於港幣 2 億元
冇依法投購僱員補償保險屬違法，一經定罪，最高可被判罰款港幣十萬元及監禁兩年，另外根據《僱員補償援助條例》（第365章）仲可能要支付附加費。廚房本身有熱油、刀具、濕滑地面，工傷風險唔低——勞保點計、保費受咩影響，可以睇 勞工保險完全指南。
2. 公眾責任險：客人入舖嘅保障
公眾責任保險唔係法例強制，但對日日有客人出入嘅餐廳嚟講係常見做法——客人踩到濕地跌親、熱湯倒瀉燙傷、或者食完覺得唔舒服要求賠償，都屬第三者責任。揀保單時有兩點值得留意：
- 食物及飲品中毒——確認保單有冇包，唔好假設一定包；
- 租約要求——簽租約前睇清楚業主有冇要求租戶投保公眾責任險同指定保額，開業前就要安排好。
如果你仲有做外賣、賣樽裝醬料或者預製食品，就要再諗埋產品責任，可以睇 產品責任保險攻略；公眾責任險嘅保額點揀，見 公眾責任險指南。
3. 財產 + 營業中斷：裝修同停業嘅風險
餐廳嘅裝修、抽風、雪櫃、爐具往往係開舖最大筆嘅投入。財產保險保障呢啲實物損失；營業中斷保險就保障因受保事故（例如火警、水浸）要停業期間嘅毛利損失同持續開支。兩樣通常一齊睇，因為對餐廳嚟講，停業幾個禮拜嘅收入損失可以比修復本身更傷。要留意，唔係所有停業原因都賠——例如冇實質損毀嘅停業，就要睇返條款，詳細可以睇 打風停業賠唔賠 同 財產 + 營業中斷指南。
4. 團體醫療：請人留人嘅工具
餐飲業請人一向唔容易，團體醫療唔係法例要求，但係好多老闆用嚟吸引同挽留廚師、樓面嘅員工福利。人數少都未必買唔到，詳情見 團體醫療指南。
開業前 checklist：陪你逐項 tick
① 請第一個員工（包括兼職、散工）之前，勞保已經生效；② 睇清楚租約對保險嘅要求；③ 公眾責任險有冇包食物及飲品中毒；④ 裝修同廚房設備有冇計入財產保額，裝修期間嘅工程風險可以睇 裝修 CAR 攻略；⑤ 每年續保時更新員工人數同工資資料。
資料來源：《僱員補償條例》（第282章）第40條；《僱員補償援助條例》（第365章）；勞工處「香港法例第282章《僱員補償條例》」常見問答。